棟篤笑OPEN MIC：演員與觀眾都值得認識的喜劇練習場
如果你開始留意香港嘅棟篤笑文化，或者本身已經有接觸喜劇表演，好大機會都聽過「Open Mic」呢個字。Open Mic，中文常譯作「開放咪」或者「開放麥」，指的是一種任何人都可以上台試演嘅表演形式，常見於 Comedy Club、酒吧、文化場地之中。對演員嚟講，Open Mic 係試材料、練舞台同學習掌控觀眾反應嘅地方；對觀眾嚟講，Open Mic 則係一個用較低門檻欣賞現場喜劇、認識新演員、感受喜劇創作過程嘅好機會。
什麼是 棟篤笑 Open Mic？
Open Mic 嘅形式通常比較自由，演員會事先報名或者到場排隊，輪流用幾分鐘時間（通常係 3 至 5 分鐘）上台表演。雖然 Open Mic 未必每一個表演都會精準好笑，但正正因為佢係「練習場」而唔係「畢業舞台」，所以觀眾往往可以見到更多未經打磨、但非常真實嘅作品。喺喜劇場景入面，Open Mic 特別重要，因為佢令新演員有機會聽到自己段子喺真實觀眾面前嘅反應，而唔係只靠朋友或對住塊鏡去估計效果。換句話講，Open Mic 係喜劇成長最基本、亦最不可或缺嘅一部分。
演員應該點樣看待 Open Mic？
演員去 Open Mic，最忌抱住「一定要爆笑」嘅心態。Open Mic 唔係 Show off 位，而係測試位、修正位、學習位。每一次上台，都應該有明確目的，而唔係單純「想上就上」。例如，你可以用今次 Open Mic 去試：
邊一句係真正嘅笑點？
邊個鋪墊太長，要刪剪？
邊個比喻觀眾聽唔明，要修改？
邊個位可以加停頓、節奏或者語氣？
如果一個段子已經打磨得夠成熟，就未必需要繼續喺 Open Mic 重複磨。因為 Open Mic 最有價值嘅地方，係幫你測試「未完成」嘅內容，而唔係無限重播同一條已完成嘅段子。所以，演員對待 Open Mic 嘅最好心態，其實係：我唔係去證明自己有幾好，而係去令段子變得更好。
觀眾應該點樣睇 Open Mic？
觀眾去 Open Mic，最好嘅心態係放鬆一啲、期望降低一啲，當自己係開盲盒，反正花的錢也不多甚至免費。因為 Open Mic 本身就係試驗場，內容未必每一段都成熟，但正正因為咁，觀眾先有機會見到演員最真實、最原始嘅創作狀態。如果你將 Open Mic 當成正式專場去睇，就好容易失望；但如果你抱住「今晚睇吓有乜新嘢發生」嘅心態，反而會更享受。甚至有時你會聽到一條未完成但好有潛力嘅 joke，或者見證一位演員由唔穩到突然找到節奏，那種現場感係錄影睇唔到嘅。所以，觀眾入場時可以記住一句：唔係每一個 Open Mic 都要完美，但每一個 Open Mic 都值得被認真看待。
香港哪裡有廣東話棟篤笑Open Mic？
如果你想親身體驗，或者想試吓上台練膽，香港其實一直有一班有心人定期舉辦 Open Mic。雖然舉辦開放咪嘅場地唔算非常多，但以下幾個廠牌同團體絕對值得你 follow：
笑林寺 ── 推動本土廣東話喜劇文化，除咗舉辦 Open Mic，仲會定期開設棟篤笑入門班、工作坊及學員展演，致力於喜劇教育。
IG: @siulam_comedy
萬人Mic (Million Dollar Mic) ── 由 2014 年開始舉辦，為香港首個固定粵語棟篤笑 Open Mic 活動，經常於灣仔 Bar109 舉行。
Mary 棟篤笑 ── 由全職表演者 Mary 舉辦，隔個月都會有「Live5️⃣Comedy 新 joke 試食 OpenMic」，場地氣氛不錯。
IG: @maryhkcomedian
米笑 (HK Comedians) ── 近年新晉嘅棟篤笑藝術註冊團體，由大咪等喜劇人成立，每個月都會有定期 Open Mic，並致力推廣本土喜劇。
IG: @hkcomedians
為什麼值得多參與 Open Mic？
無論你係演員定觀眾，Open Mic 都值得你多參與。對演員來說，佢係磨練段子、提升自信嘅地方；對觀眾來說，佢係用更輕鬆方式接觸現場喜劇、支持本地創作人嘅方法。香港想令喜劇文化真正發光發亮，唔可以只靠少數成熟演員，而係要有更多願意試、願意失敗、願意再上台嘅人。每一次有人上台，每一次有人坐低聽，喜劇文化就再向前一步。下次如果你見到有 Open Mic，無論你係想上台，定係只係想輕鬆睇吓，都不妨參與一下。你可能會喺笑聲之中，搵到屬於香港喜劇真正嘅生命力。
Comments